ጥያቄዎቻችሁ
1. መዳን የሚገኘው በእምነት ነው ወይስ መልካም ሥራን በመሥራት ነው?
መልስ
መዳን የሚገኘው በእምነት መሆኑን በርካታ የመጽሐፍ ቅዱስ ክፍሎች ይናገራሉ፤ ጥቂቶቹም እንደሚከተለው ተጠቅሰዋል፡፡
- «በልጁ የሚያምን የዘላለም ሕይወት አለው፤ በልጁ የማያምን ግን የእግዚአብሔር ቊጣ በእርሱ ላይ ይኖራል እንጂ ሕይወትን አያይም» /ዮሐ.3፡36/፡፡
- «ኢየሱስም መለሰ አላቸውም ... እውነት እውነት እላችኋለሁ በእኔ የሚያምን የዘላለም ሕይወት አለው»/ዮሐ.6፡47/፡፡
- «በጌታ በኢየሱስ ክርስቶስ እመን አንተና ቤተ ሰዎችህም ትድናላችሁ» /የሐ.ሥ.16፡31/፡፡
- «አሁን ግን በሕግና በነቢያት የተመሰከረለት የእግዚአብሔር ጽድቅ ያለ ሕግ ተገልጧል፤ እርሱም ለሚያምኑ ሁሉ የሆነ በኢየሱስ ክርስቶስ በማመን የሚገኘው የእግዚአብሔር ጽድቅ ነው»/ሮሜ3፡21‐22/፡፡
- «መጽሐፍም እግዚአብሔር አሕዛብን በእምነት እንዲያጸድቅ አይቶ በአንተ አሕዛብ ሁሉ ይባረካሉ ብሎ ወንጌልን ለአብርሃም አስቀድሞ ሰበከ» /ገላ.3፡8/፡፡
- «የዘላለም ሕይወት እንዳላችሁ ታወቁ ዘንደ በእግዚአብሔር ልጅ ስም ለምታምኑ ይህን ጽፌላችኋለሁ» /1ዮሐ.5፡13/፡፡
መጽሐፍ ቅዱስ መዳን የሚገኘው በእምነት መሆኑን የሚገልጸውን ያህል በሥራ እንደማይገኝም በአጽንኦት ይናገራል፤ ይህንንም በሚከተሉት ጥቅሶች ውስጥ እናያለን፡፡
- «ሰው ያለ ሕግ ሥራ በእምነት እንዲጸድቅ እንቈጥራለንና» /ሮሜ3፡28/
- «... ነገር ግን ሰው በኢየሱስ ክርስቶስ በማመን እንዲጸድቅ እንጂ ሥጋን የለበሰ ሁሉ በሕግ ሥራ ስለማይጸድቅ እኛ ራሳችን በሕግ ሥራ ሳይሆን በክርስቶስ እምነት እንጸድቅ ዘንድ በክርስቶስ ኢየሱስ አምነናል» /ገላ.2፡16/፡፡
- ጻድቅ በእምነት ይኖራል ተብሏልና ማንም በእግዚአብሔር ፊት በሕግ እንዳይጸድቅ ግልጥ ነው» /ገላ.3፡11/፡፡
- «ጸጋው በእምነት አድኗችኋልና፤ ይህም የእግዚአብሔር ስጦታ ነው እንጂ ከእናንተ አይደለም፤ ማንም እንዳይመካ ከሥራ አይደለም» /ኤፌ.2፡8/፡፡
- «... ነገር ግን የመድኃኒታችን የእግዚአብሔር ቸርነትና ሰውን መውደዱ በተገለጠ ጊዜ እንደ ምሕረቱ መጠን ለአዲስ ልደት በሚሆነው መታጠብና በመንፈስ ቅዱስ በመታደስ አዳነን እንጂ እኛ ስላደረግነው በጽድቅ ስለነበረው ሥራ አይደለም»/ቲቶ 3፡4‐5/፡፡
ስለዚህ ከእነዚህ ሁሉ የመጽሐፍ ቅዱስ ክፍሎች መዳን የሚገኘው በእምነት እንጂ በሥራ እንዳልሆነ በግልጽ እንማራለን፡፡
www.ewnet.org.et/btm_files/FAQ0.htm